Dinukot ng mga hinihinalang miyembro ng Abu Sayyaf ang isang South Korean national at isang Pilipinong tripolante ng Korean cargo ship na M/V Dongbang Giant sa bahagi ng Bonggao, Tawi-Tawi.
Ayon kay Major Filemon Tan, tagapagsalita ng Western Mindanao Command, tinatayang 10 bandido ang pumasok sa nasabing barko kung saan tinangay ang kapitan ng barko na si Park Chul Hong gayudin ang tripolante nitong si Glen Alindajao na taga-Cebu.
Sinasabing tagasunod ni Abu Sayyaf Sub Leader Idang Susukan na nakabase sa Sulu ang mga bandidong sumalakay sa Korean ship.
Kasalukuyan nang nakaalerto ngayon ang joint task force Tawi-Tawi at ang lahat ng unit nito upang tugisin ang mga pinaniniwalaang bandido at masagip ang mga binihag.
By Jaymark Dagala | Jonathan Andal (Patrol 31)
