Nananatili ang kumpiyansa ni Pangulong Rodrigo Duterte kay Transportation Secretary Art Tugade gayundin sa lahat ng mga hakbang nito.
Ito ang sagot ng Malakanyang sa harap na rin ng lumalakas na panawagang sibakin na si Tugade sa puwesto dahil sa kabiguan umano nitong maresolba ang malalang problema sa trapiko.
Ayon kay Presidential Communications Assistant Secretary Ana Marie Banaag, bagama’t marami ang dismayado kay Tugade kaya ito pinagbibitiw, ngunit nakikita naman ang pagsusumikap nito para matugunan ang problema.
Una nang isinusulong ni Tugade sa kongreso na gawaran ang Pangulo ng emergency powers na siya anitong kinakailangan upang masolusyunan na ang lumalalang problema sa trapiko sa iba’t ibang bahagi ng bansa.
By: Jaymark Dagala
