Idinaan ng RNB singer na si Chris Brown sa Instagram ang kanyang apela na makaalis na sa Pilipinas.
Makikita sa lumabas na video na nakaluhod si Brown habang nagmamakaawang payagan na silang umalis ng bansa.
May caption ang video na Obama na tila nagpapasaklolo na si Brown kay US President Barack Obama.
Inireklamo ng estafa ng Maligaya Development Corporation si Brown at pinagbabayad ng 1 milyong dolyar dahil sa hindi nito pagsipot sa New Year’s countdown concert ng Iglesia ni Cristo.
Kaugnay nito, posible pa ring makaalis ang RNB singer na si Chris Brown sa kabila ng one million dollar estafa case na kinakaharap nito.
Ayon kay DOJ Sec. Leila de Lima, kailangan lamang na kumuha si Brown ng Emigration Clerance Certificate o ECC mula sa Bureau of Immigration (BI).
Nasa kamay na aniya ng Immigration Commissioner kung papayagan nito o hindi na makaalis ng bansa.
Sa huling ulat ng BI, bigo pa ring kumuha ng ECC ang kampo ni Brown.
By Rianne Briones
