Tatlong construction workers na binihag ng Abu Sayyaf Group sa Sulu ang nakatakas.
Ayon kay Joint Task Force Sulu Commander Brig/Gen. Cirilito Sobejana, natagpuan ang tatlong bihag 9:00 ng umaga ng Biyernes sa Barangay Kagay, Talipao matapos itimbre ng mga residente doon.
Kinilala ang mga nakatakas na bihag na sina Jason Pon Vailoces, Joel De Mesa Adanza at Filemon Francisco Guerrero Jr. na pawang mga residente ng Barangay Tumaga, Zamboanga City.
Batay sa kwento ng tatlo, nakatakas sila pasado 4:00 ng hapon noong Huwebes habang nagdadasal ang mga miyembro ng Abu Sayyaf na may hawak sa kanila at tumakbo hanggang makarating ng Barangay Kagay umaga ng Biyernes.
Nakatakdang dalhin sa Zamboanga City ang tatlo matapos ang kanilang medical examination at custodial debriefing.
Ang tatlo ay kabilang sa limang mga construction workers na dinukot ng Abu Sayyaf Group noong Hulyo 15 sa Patikul, Sulu.
