Patuloy ang isinasagawang manhunt operation ng 6th Infantry Division ng Philippine Army laban sa mga miyembro ng BIFF o Bangsamoro Islamic Freedom Fighters na nagtangkang magsagawa ng pang-aatake sa Barangay Olagandang sa bayan ng Midsayap, North Cotabato.
Ayon kay Captain Arvin Encina, tagapagsalita ng 6th ID, ipinagbigay-alam sa kanila ng mga residente sa nabanggit na lugar na mayroong presensya ng armadong grupo na nagsasagawa ng pananakot at nagpapaputok pa umano ng armas.
Bigong maaresto ng militar ang mga rebelde sa kanilang isinagawang operasyon ngunit natuklasan ng mga ito ang kanilang pinagkukutaan.
Narekober dito ang iba’t ibang matataas na kalibre ng mga baril, mga bala, kasangkapan sa paggawa ng pampasabog at mga eksplosibo.
By Arianne Palma
