Hindi maaaring tumestigo si Ginang Patricia Bautista sa isinampang impeachment complaint laban sa asawang si Commission on Elections (COMELEC) Chairman Andy Bautista sa mababang kapulungan ng Kongreso.
Ito’y ayon kay Majority Floor Leader Rodolfo Fariñas, ay dahil hindi kabilang si Ginang Patricia sa mga complainant sa reklamo laban kay Chairman Bautista.
Pagliwanag ni Fariñas, alinsunod sa batas may tinatawag na spousal privilege kung saan hindi maaaring mag-testify ang isang indibidwal laban sa kanyang asawa kung walang siya isinampang kaso laban dito.
Dagdag pa ng mambabatas, lumalabas na sina dating Negros Oriental Representative Jacinto Paras at Atty. Ferdinand Topacio ang complainant ng kaso dahil sila ang naghain nito.
Binigyang diin din ni Fariñas na bilang complainant ay dapat may personal knowledge sina Paras at Topacio sa kanilang mga alegasyon laban kay Bautista bukod pa sa pagkakaroon ng certified copy ng mga dokumento kaugnay dito.
Kasunod nito, pinayuhan ni Fariñas sina Paras at Topacio na pag-aralan ang kanilang inihablang reklamo bago ito maisulong sa Kamara de Representantes.
