Nakatutok ang Malacañang sa mga pinakahuling pangyayari hinggil sa pananalasa ng hurricane Irma sa Florida state sa Amerika.
Ayon kay Presidential Spokesman Ernesto Abella, mahigpit ang kanilang pakikipag-ugnayan sa konsulada ng Pilipinas sa Miami hinggil sa kalagayan ng mga Pilipinong naroon.
Kasunod nito, pinayuhan ng Palasyo ang mga Pilipino sa Florida na manatili muna sa kani-kanilang mga tahanan at iwasan ang mga pagbiyahe.
Hinimok din ni Abella ang mga kababayan doon na tumutok sa mga balita hinggil sa lagay ng panahon gayundin sa mga abisong ipalalabas ng pamahalaan ng Amerika hinggil dito.
—-
