Arestado ng pinagsanib na puwersa ng Korean National Police at ng Bureau of Immigration ng Pilipinas ang isang Korean national na matagal nang wanted sa kanilang bansa at nagtatago rito sa bansa.
Batay sa isinumiteng spot report ng immigration sa DOJ o Department of Justice, sinabi ni Usec. Erickson Balmes na naaresto ang puganteng si Noh Jun Ho sa barangay Cauyan, Angeles City sa Pampanga.
Batay sa official communication mula kay South Korean Consul at Police Attache Lee Soo Bok, kabilang si Noh sa red notice ng INTERPOL o International Police dahil sa paglabag nito sa narcotics control act ng SOKOR.
Agad dinala ang puganteng Koreano sa warden facility ng Bureau of Immigration sa Taguig City para sa commitment order upang agad itong maipatapon pabalik sa kanilang bansa.
