Bineberipika pa ng Department of Foreign Affairs (DFA) ang napaulat na isa umanong Pilipina ang kabilang sa namatay sa pagsabog sa Bangkok, Thailand na kumitil din sa buhay ng mahigit 20 iba pa.
Sa panayam ng programang “Ratsada” kay DFA Spokesman Assistant Secretary Charles Jose, sinabi nito na kasalukuyan pang inaalam ni Philippine Embassy to Thailand Consul General Edgar Badajos ang naturang ulat.
Nabatid na nagpadala na ng tauhan ang embahada sa pagamutan para maberipika ang nasabing report.
Una rito, inihayag ni Badajos na patuloy ang pakikipag-ugnayan nila sa Filipino communities sa Thailand para mabatid kung may iba pang Pinoy na nadamay sa pagsabog.
“Wala pa pong kumpirmasyon ‘yun, natanggap naman po namin ‘yung report na ‘yun from the war services ang ginagawa po ng ating embassy sa Bangkok ay vine-verify ang information na ‘yan.” Pahayag ni Jose.
By Meann Tanbio | Ratsada Balita
