“Hindi pa tapos ang laban.”
Ito ang mensahe ng pamilya ni Dr. Gerry Ortega kay dating Palawan Governor Joel Reyes makaraang palayain ito ng Court of Appeals.
Si Reyes ang itinuturong mastermind sa pagpatay kay Ortega, isang environmentalist at broadcaster na bumabatikos sa mga di umano’y katiwalian ng dating gobernador.
Kinontra ni Mica Ortega, anak ni Ka Gerry ang CA na nagsabing hindi gumagalaw ang kaso ni Reyes sa mababang korte sa Palawan.
Sa katunayan aniya ay dalawa na ang sentensyado sa kasong pagpatay sa kanyang ama dahil sa pag-amin nila sa krimen at umaandar na ang proseso para litisin si Reyes bilang mastermind.
“Hindi naman po tapos ang laban may mga options naman to move forward, yung mismong gunman umamin na siya so na-convict na siya, yung isa sa mga personal aide ni former governor Joel Reyes na si Arturo Regalado ay na-convict na rin, so nagkaroon na po ng dalawang conviction, itong huli na kasi, dahil tinatapos per respondents, maraming mga taong involved, ito nang pang-huli ay itong kay Governor Joel Reyes, siya na ang pinag-uusapan, yung proceedings po papunta na sa kanya, papunta na sa mastermind.” Ani Mica Ortega
Magugunitang isa si Reyes sa mga pangunahing salarin sa pagpatay kay Doc Gerry noong Enero 24 taong 2011 bunsod ng kaniyang naging pagbubunyag hinggil sa paglustay umano sa pondo ng Malampaya natural gas facility ng lalawigan.
(Ratsada Balita Interview)
