Trending at inuulan ng batikos ang Kapamilya star at “Pilipinas Got Talent” o PGT judge na si Robin Padilla makaraang puwersahin nito ang isang Korean contestant na magsalita ng Tagalog.
Sa episode ng PGT sa ABS-CBN kahapon, tinanong ni Robin kung marunong mag-Tagalog ang constestant na si Kim Jiwan na sampung taon ng naninirahan sa Pilipinas.
Gayunman, ingles ang sagot ni Kim at aminadong hindi itinuturo ang Tagalog sa International School Muntinlupa na kanyang pinapasukan.
Dahil dito, sinermunan ni Binoy ang Korean contestant kaya’t “to the rescue” naman ang kapwa judge na si Angel Locsin at tinuruan ng kaunting Tagalog ang kalahok.
Matapos nito ay ipinakita na ni Kim sa mga hurado at viewer ang kanyang Magic tricks na umani naman ng apat na “yes” at bandang huli ay humingi ng paumanhin ang “bad boy” at nilinaw na isang uri lamang ng pagdidisiplina ang kanyang ginawa bilang isang ama.
Hindi naman pinalampas ng ilang netizen ang naturang insidente at inakusahan si Robin na “bastos” “racist” at “insensitive” kay Kim.
Pero binaliwala ito ng aktor sa halip ay iginiit na wala namang masama sa kanyang ginawa at natural lamang na pag-aralan ng isang dayuhan ang wika sa bansa na kanyang binibisita o pinupuntahan.
