Tinawag na ‘harassment’ ng Makabayan Bloc sa Kamara ang pag – aresto sa consultant ng National Democratic Front of the Philippines o NDFP na si Rafael Baylosis.
Ayon kay Bayan Muna Partylist Representative Carlos Isagani Zarate, pinahina lamang lalo nito ang posisyon ng NDFP consultants sa pakikipag – usap sa gobyerno partikular na sa paglalagda ng Comprehensive Agreement on Social and Economic Reforms na pending sa ngayon sa peace table.
Giit pa ni Zarate, ang pagkakadakip kay Baylosis ay isang paglabag sa Joint Agreement on Safety and Immunity Guarantees o JASIG sa pagitan ng gobyerno at NDFP noong 1995.
Para naman kay Kabataan Partylist Representative Sarah Elago, bahagi ng ‘grand crackdown’ at all-out war kontra taumbayan ang pagkakadakip kay Baylosis.
Habang sinabi naman ni ACT Teachers Partylist Representative Antonio Tinio na ang naging hakbang ng gobyerno ay paglabag din sa Comprehensive Agreement on Respect for Humanitarian Law.
