Muling nagkasagupa ang militar at New Peoples Army sa Balayan, Batangas.
Sinabi ni Capt. Patrick Jay Retumban, 2nd Infantry Division, Public Information Officer, umabot ng halos 30 minuto ang palitan ng putok ng mga sundalo at remnants ng sub-regional military area 4c sa Sitio Kapihan, Barangay Patugo na nagresulta sa pagkakasugat ng dalawang miyembro ng 202nd Army Brigade.
Base sa ulat, napilitang umatras ang mga miyembro ng komunistang grupo, dahil sa tindi at lakas ng opensiba ng tropa ng pamahalaan.
Patuloy namang biniberipika ng militar kung maraming nalagas o nasawi sa panig ng NPA dahil sa mga bakas ng dugo na naiwan sa pinangyarihan ng labanan.
Samantala, nagkaroon pa ng ikalawang sagupaan doon, makaraang maka-engkwentro ng isa pang grupo ng militar na nagsasagawa ng combat operations ang mga tumatakas na NPA.
