Hinimok ng kampo ni Chief Justice Maria Lourdes Sereno ang Kamara na bilisan ang pag-aakyat sa Senado ng impeachment case laban sa punong mahistrado.
Ayon kay Atty. Josa Deinla, tagapagsalita ni Sereno, sabik na aniya ang punong mahistrado na sagutin sa impeachment court ang lahat ng mga ibinibintang laban sa kaniya.
Muling iginiit ni Deinla ang paniniwala ng kanilang kampo na tanging ang impeachment lamang ang paraan para mapatalsik sa puwesto si Sereno kaya’t ito aniya ang kanilang pinaghahandaan.
Magugunitang inaprubahan na kahapon ng House Committee On justice ang Articles of Impeachment na siyang gagamiting argumento sa impeachment court laban sa punong mahistrado.
