Nasakote ng militar ang limang (5) armadong lalaki isang bayan sa Maguindanao.
Ayon kay 33rd Infantry Battalion Commanding Officer Lt. Col Harold Cabunoc, nadakip ang mga nasabing kalalakihan sa ikinasang operasyon ng pinagsanib na puwersa ng Philippine Army at Philippine National Police sa bayan ng Paglat.
Target aniya sana ng operasyon ang pinagkukutaan ng mga miyembro ng BIFF o Bangsamoro Islamic Freedom Fighters na pinamumunuan ni Sindatok Dilna alyas Motolite na may kaugnayan din kay Commander Gani Saligan.
Dagdag ni Cabunoc, hindi na nanlaban ang mga suspek matapos na mapalibutan ng mga awtoridad ang kanilang pinagtataguan.
Narekober naman sa mga suspek ang tatlong armas kabilang ang isang armalite rifle at dalawang kalibre kuwarenta’y singkong baril.
—-
