Hinimok ni Senador Aquilino “Koko” Pimentel III ang pamahalaan na palawakin na ang saklaw ng kampaniya nito kontra iligal na droga.
Ayon kay Pimentel, panahon na para puntiryahin ang mga drug lord gayundin ang mga galamay nito na siyang nasa likod ng paggawa at pagpupuslit ng droga sa bansa.
Giit ni Pimentel, dapat nang pagsabay-sabayin ang pagtugis sa mga drug lord na itinuturing na big fish kasama ang mga small time pushers at maging ang mga gumagamit ng ipinagbabawal na gamot.
Dapat aniyang maging target ngayon ng gubyerno na maging drug free na ang Pilipinas at magagawa lang iyon kung paiigtingin pa ng pamahalaan ang kanilang hakbang para masupil na ang itinuturing na salot sa lipunan.
