Sumampa na sa 4.2 bilyong piso ang halaga ng pinsalang dulot ng bagyo sa imprastraktura at agrikultura.
Ayon sa National Disaster Risk Reduction and Management Council o NDRRMC, pinakamalaking napinsala ang mga imprastraktura sa Bicol, Eastern Visayas, MIMAROPA at CALABARZON regions na aabot sa 3.3 bilyong piso ang halaga.
Mahigit sampung libo apatnaraang (10,400) kabahayan naman ang nasira o bahagyang napinsala sa mga nasabing lugar.
Samantala, nasa ilalim pa rin ng state of calamity ang mga lalawigan ng Camarines Norte, Camarines Sur, Albay, bayan ng Bulan Sorsogon at Oriental Mindoro.
3.4 bilyong piso inilaan ng DA para sa mga magsasaka
Naglaan naman ang Department of Agriculture (DA) ng 3.4 na bilyong piso bilang tulong sa libu-libong magsasakang naapektuhan ng bagyong Usman.
Ayon kay Agriculture Secretary Emmanuel Piñol, halos tatlumpung libong (30,000) magsasaka ang makikinabang sa financial aid.
Itinurn-over naman ni Piñol ang mga farm material at machinery na nagkakahalaga ng 3.2 milyong piso sa isanlibong (1,000) magsasaka sa Libon, Albay.
Batay sa datos ng DA, aabot sa labindalawang libong (12,000) ektaryang taniman ang nasira at pinakamatinding naapektuhan ang Bicol Region.
—-
