Nagpaabot ng pakikiramay ang Malacañang sa mga pamilya ng mga naging biktima ng lumubog na tatlong bangka sa Iloilo- Guimaras Strait.
Sinabi ni Presidential Spokesman Salvador Panelo na kanilang ikinalulungkot ang nangyaring trahedya lalo’t tatlong bangka ang magkakasunod na lumubog sa naturang karagatan.
Kasabay nito, inatasan din ng palasyo ang Philippine Coast Guard at Maritime Industry Authority na paigtingin pa ang koordinasyon para matiyak ang kaligtasan ng publiko lalo na sa panahon ng tag-ulan.
Ipinabatid ni Panelo ang posibleng pagdalaw ni Pangulong Rodrigo Duterte sa mga biktima sa mga susunod na araw.
