Nanawagan si Presidential Spokesman Salvador Panelo na magbitiw na sa pwesto ang head ng Philippine Military Academy (PMA).
Ito’y kasunod ng nakumpirmang pagkasawi ng isang PMA cadet dahil sa hazing.
Ginawa ni Panelo ang naturang panawagan kay Lieutenant General Ronnie Evangelista, PMA Superintendent, kahit pa nangako na si Evangelista na maghahain siya ng kaukulang parusa at pananagutan sa mga mapatutunayang may sala sa pagkamatay ni Cadet Fourth Class Darwin Dormitorio.
Samantala, sa hiwalay na pahayag ay sinabi rin ni Panelo na kanilang ikinalungkot ang naturang hazing incident.
Kinokondena aniya ng Tanggapan ng Pangulo ang anumang uri ng hazing.
