Pinakilos na ng Pangulong Rodrigo Duterte ang Metropolitan Waterworks and Sewerage System (MWSS) para busisiin ang kontrata ng water concessionaires.
Ito, ayon kay Cabinet Secretary Karlo Nograles, ay kasunod ng galit ng pangulo sa ipinatutupad na water interruption sa Metro Manila.
Sinabi ni Nograles na katuwiran ng pangulo, hindi na dapat nararanasan ng mga taga-Metro Manila ang rotational water interruption dahil naranasan na ito noong Marso at nabigyan na ng solusyon.
Nais aniyang malaman ng pangulo kung may paglabag o pananagutan ang Manila Water at Maynilad sa panibagong rotational water interruption.
Inihayag pa ni Nograles na malabo namang ibalik sa gobyerno ang pamahahala sa water concessionaires dahil masalimuot ang proseso nito.
