Nais paimbestigahan ng grupong Gabriela sa Movie Television Review and Classification Board o MTRCB ang di umano’y pambubugaw ng programang It’s Showtime sa tinagurian nilang Pastillas girl.
Ayon sa ipinadalang sulat ni Gabriela Secretary General Joan May Salvador kay MTRCB Chiarman Atty. Toto Villareal, marami umanong natatanggap na reklamo ang kanilang grupo dahil sa di umanoy pang-aabuso ng nasabing programa kay pastillas girl sa pamamagitan ng pagrereto sa iba’t ibang mga lalaki.
Maliban sa MTRCB, nagpadala na din ng liham ang Gabriela sa executive producer ng It’s Showtime upang pasagutin sa mga alegasyon laban sa kanila.
Ayon sa Gabriela, bilang tagapagtaguyod ng karapatan ng mga babae hindi umano nila kayang balewalain ang mga sumbong at reklamong ipinaparating sa kanila kaugnay nga sa isyu ng di umanoy mistulang pambubugaw sa telebisyon.
By: Jonathan Andal
