Inamin ni Senador Grace Poe na kailangan na niyang simulang mag-ikot sa buong bansa bagamat ikinatutuwa nito ang patuloy na pangunguna sa Presidential surveys.
Sa pinakahuling resulta ng Presidential survey ng Pulse Asia, nakakuha ng 26% si Poe, ikalawa si dating DILG Secretary Mar Roxas sa 20%, ikatlo si Vice President Jejomar Binay sa 19% at ikaapat si Davao City Mayor Rodrigo Duterte sa 16%.
Muling nagpasalamat si Poe sa tiwala sa kaniya ng taumbayan na siyang pinaghuhugutan aniya niya ng lakas at nagpapaalalang dapat pagtuunan niya ng pansin ang pagtatrabaho at paglilingkod ng husto.
Samantala, hindi nakadalo si Poe sa national convention ng unity party ngayong araw na ito dahil may naunang commitment na siya at nagbigay naman aniya sila ng abiso sa organizers.
Disqualification
Samantala, hindi otomatikong madi-disqualify si Senador Grace Poe sakaling mag-desisyon ang SET o Senate Electoral Tribunal na may basehan ang pagkuwestyon sa citizenship nito.
Ito ayon kay Senador Bam Aquino, miyembro ng SET ay dahil ang nakasampang pagkuwestyon sa citizenship ni Poe ay para lamang i-disqualify ito bilang senador.
Kaugnay nito, sinabi ni Aquino na walang nagtatangka na kausapin sila sa SET para impluwensyhan ang kanilang desisyon sa usapin.
By Judith Larino | Cely Bueno (Patrol 19)
