Nagpositibo sa coronavirus disease 2019 (COVID-19) ang anak ni Caloocan City Mayor Oscar Malapitan at kasalukuyan ding konsehal ng lungsod.
Batay sa post sa social media ni Caloocan City Councilor Enteng Malapitan, kasalukuyang stable ang kanyang kondisyon.
Sumasailalim na aniya siya sa quarantine gayundin ang kanyang pamilya.
Pagtitiyak naman ni Enteng na nasa maayos na kalagayan ang kanyang ama na si Mayor Oscar Malapitan at kapatid na si Councilor Along.
Bago pa man aniya siya magpositibo ay may social distancing na silang mag-aama dahil magkakahiwalay ang kani-kanilang pamamahay.
Samantala, hinimok naman ni Enteng ang kanyang mga nakasalamuha simula noong Marso 15 na sumailalim na rin sa self-quarantine bilang pag-iingat at pag-iwas sa posibleng pagkalat ng COVID-19.
