Itinanggi ni Cong. Lray Villafuerte na maituturing na government takeover ang resolusyon niya na gamitin ang frequency ng ABS-CBN sa distance learning.
Ayon kay Villafuerte, malinaw sa kanyang resolusyon na pansamantala lamang gagamitin ng pamahalaan ang frequency ng ABS-CBN hanggang sa i-award ito sa karapat dapat na kumpanya.
Hindi anya nya ginamit ang section 18 article 12 ng konstitusyon kung saan pinapayagan ang government takeover sa isang pribadong kumpanya sa panahon ng national emergency.
Sinabi ni Villafuerte na iminungkahi nya ang negosasyon sa ABS-CBN para magamit ang kanilang transmitter at equipment sa distance learning at mabigyan rin ng trabaho ang mga apektado sa pagkawala ng prangkisa ng network.
Aminado si Villafuerte na kulang sa pondo, expertise at equipment ang gobyerno para magamit ang frequency ng ABS-CBN sa distance learning.
