Naglabas na ang Bureau of Corrections (BuCor) ng larawan ng labi ng high profile inmate na si Jaybee Sebastian.
Ito’y para sagutin ang mga namumuong duda na mayroon umanong foul play sa pagkamatay ni Sebastian.
Batay sa ulat, ang naturang larawan na ipinakita ng BuCor ay ang labi ni Sebastian bago ito ma-cremate kung saan makikita rito ang kaniyang tattoo sa katawan.
Maliban dito, ipinakita rin ng BuCor ang death certificate ng walo pang bilanggo na nasawi rin dahil sa coronavirus disease 2019 (COVID-19).
Personal ding binasa ni New Bilibid Prison Hospital Director Dr. Henry Fabro ang naging sanhi ng kamatayan ni Sebastian ng “myocardial infraction” na kumplikasyon ng COVID-19.
Ipinabatid ni BuCor Legal Officer Atty. Hobert Luz na handa silang ipakita ang medical records ng iba pang nasawing bilanggo kung kinakailangan.
