Nagbabala ang World Health Organization (WHO) sa kumakalat na suhestyon na pabayaan na lang kumalat ang Corona Virus Disease 2019 (COVID-19) sa pag-asang makakakuha ng herd immunity o natural na panlaban sa sakit ang madadapuan nito.
Ayon kay WHO Chief Tedros Adhanom Ghebreyesus, ang herd immunity ay isang konsepto na ginagamit sa pagbabakuna kung saan ang buong populasyon na bakunado na ay masasabing protektado na sa virus kung ang karamihan nito ay nabakunahan na.
Dagdag pa ng WHO, ang herd immunity ay makukuha sa pagprotekta sa mga tao laban sa virus at hindi sa pagpapakalat nito, kailanman ay di ginamit ang stratehiyang ito kapag may outbreak o pandemya.
Giit ni Tedros, ang pagdepende sa herd immunity sa panahong ito kung saan marami na ang nakitil na buhay ng COVID-19 sa buong mundo ay scientifically at ethically problematic kaya’t kailanman ay ‘di ito matuturing na opsyon.
Matatandaang si UK Prime Minister Boris Johnson ang isa sa nagsuhestyon ng ideyang ito para labanan ang COVID-19. — sa panulat ni Agustina Nolasco