Sumampa na sa mahigit 27,000 ang kabuuang bilang ng mga tradisyonal na jeepney na pinapayagan nang makapasada ng Land Transportation Franchising and Regulatory Board (LTFRB) sa Metro Manila.
Ito ay makaraang magbukas pa ang ahensya ng panibagong 44 na ruta sa Kalakhang Maynila kaya’t pumalo na ito sa kabuuang 302 na ruta.
Nasa 27,016 kabuuang bilang ng jeepneys naman ang umaarangkada na matapos payagan na ring magbalik-operasyon ang nasa 4,820 iba pa.
Nangako naman ang LTFRB na magbubukas pa sila ng mas marami pang ruta para sa mga public utility vehicles (PUVs) matapos ang pagsuspinde sa operasyon ng mga ito sa gitna ng nararanasang coronavirus disease 2019 (COVID-19) pandemic.
Narito naman ang kabuuang bilang ng mga binuksang ruta sa Metro Manila, maging ang mga sasakyang maaring pumasada:
- traditional public utility jeepney – 302 routes – 27,016 units allowed
- modern PUJ – 48 routes – 845 units
- public utility bus (PUB) – 34 routes – 4,016 units
- point-to-point bus – 34 routes – 387 units
- UV Express – 76 routes – 3,263 units
- taxi – 20,927 units
- transport network vehicles services (TNVS) – 24,356 units
- provincial public utility bus (PUB) – 12 routes with 286 units
- modern UV Express – two routes – 40 units.