Inirekomenda ng isang miyembro ng panel of vaccine experts ang mga bakunang sumailalim na sa phase 3 ng clinical trials para sa mga senior citizens katulad ni Pangulong Duterte.
Ayon kay Dr. Rontgen Solante, kabilang dito ang mga bakuna kontra COVID-19 na likha ng mga kumpanyang Pfizer, Moderna at Astrazeneca.
Ani Solante, isa sa pinakamahalagang datos na kanilang tinitignan ang resulta ng phase 3 clinical trial ng mga bakuna bago pagpasiyahan ang pagpapaturok nito sa nakararaming mga Filipino.
Aniya, mahalaga ito dahil nangangahulugan itong nasubok o naibigay na sa mas nakararami ang bakuna kung saan masusuri na ang effectivity at pagiging ligtas nito.
Dagdag ni Solante, wala rin siyang nakikitang problema kung unang mababakunahan kontra COVID-19 ang mga nakatatanda dahil mas mataas ang panganib na magkaroon ang mga ito ng severe na sintomas ng sakit.
