Itinatag ni Elizabeth Wanjiru Muriuki, isang dating social worker at teenage mother ang Serene Haven Secondary sa isang burol sa Kenya na inilaan para sa mga batang ina na natigil sa pag-aaral dahil sa maagang pagbubuntis.
Ito ay kasunod ng paglobo ng kaso ng sexual abuse at teenage pregnancy sa bansa sa kasagsagan ng COVID-19 lockdown.
Nagbukas ang naturang paaralan kasabay ng muling pagbubukas ng ilang paaralan sa Kenya nitong Enero, kung saan mayroon din itong daycare at counselling services na ibinibigay para sa mga batang ina.
Batay sa panayam ng Reuters kay Muriuki karamihan sa mga teenage mom na nais ipagpatuloy ang kanilang pag-aaral ay nabuntis sa kasagsagan ng pandemyang COVID-19 at ipinagbabawal ang face-to-face classes.
Gaya na lamang ni Emily, 17 taong gulang na pinagsamantalahan ng kanyang tutor dahilan upang magdalang tao sa murang edad at pagbawalan ng ina na bumalik sa eskwelahan dahil sa tuksong maaaring danasin ng anak, base sa panayam ng Reuters.
Matatandaang,una nang naiulat ng Kenya Health Information System nitong nakaraang taon na nasa 152,000 na ang kaso ng teenage pregnancy sa bansa.—sa panulat ni Agustina Nolasco