Umabot na sa 80% ng mga kama na inilaan para sa mga COVID-19 patient sa Philippine General Hospital (PGH) ang okupado na.
Ayon kay Dr. Jonas Del Rosario, tagapagsalita ng PGH, nasa 177 pasyente ang kasalukuyang naka-admit sa kanila dahil sa nakahahawang sakit.
Nasa 200 lamang umano ang kamang nakalaan para sa mga COVID-19 patient at pito hanggang 10 naman kada araw ang mga pasyenteng dinapuan ng naturang sakit ang kanilang tinatanggap.
Ani Del Rosario, hindi naman agad nila napapauwi ang mga pasyenteng ito dahil sa oras na ma-admit dahil sa COVID-19, labing apat na araw ang pinakamabilis nang itatagal nito sa ospital.
Kaugnay nito, sinabi ni Del Rosario na pinagaaralan na nila ang pag bubukas ng karagdagan pang ward kung saan may karagdagang 30 kama para sa mga COVID-19 patient.