Ikinasal na ang pop star na si Ariana Grande sa kanyang real estate agent boyfriend sa California nitong nakalipas na weekend, limang buwan matapos ma-engage ang couple.
Enero ng taong 2020 nang magsimulang mag-date ang 27 anyos na si Grande at Dalton Gomez, 25 taong gulang.
Ayon sa kampo ni Grande, isang intimate wedding ang naganap sa pagitan ng pop star at boyfriend nito at dinaluhan ng halos 20 katao lamang.
Masayang-masaya anito, hindi lamang ang bagong mag-asawa, kundi maging ang kani-kanilang mga pamilya sa pag-iisang dibdib ng couple na ginawa sa bahay ni Grande sa Montecito, Southern California.
Taong 2018 nang ma-engage si Grande kay Saturday Night Live comedian Pete Davidson subalit naghiwalay din makalipas ang limang buwan.
Matagal naman ang naging relasyon ni Grande sa rapper na si Mac Miller na nasawi sa aksidenteng drug overdose, apat na buwan matapos silang maghiwalay ng pop star noong 2018.
