Malagim ang sinapit ng dalawang biker matapos masabugan ng isang improvised explosive device o IED na ikinamatay ng mga ito sa Barangay Anas, Masbate City.
Ayon kay Bicol Regional Police spokesperson Maj. Ma. Luisa Calubaquib, kabilang sa mga nasawi ang football player na si Kieth Absalon ng Malaya Football Club at Far Eastern University football team, gayundin ang kanyang tiyuhin na si Nolven Absalon.
Sugatan naman sa insidente ang hindi pinangalanang anak ni Nolven na 16 taong gulang.
Sa imbestigasyon, papunta sana sa Barangay B. Titong ang mga biktima nang mangyari ang insidente.
Agad namang inalerto ang mga awtoridad sa mga lugar na posibleng daanan o puntahan ng mga responsable sa naturang pagsabog.
