Diskumpiyado ang Armed Forces of the Philippines o AFP sa pangako ng Communist Party of the Philippines – New People’s Army o CPP-NPA na magbabayad ng danyos sa pamilya ng College Football player na si Keith Absalon at pinsan nitong si Nolven.
Ayon kay AFP Spokesman Marine M/Gen. Edgard Arevalo, malinaw na krimen ang ginawa ng mga komunista kung saan, tatlong batas ang kanilang nalabag na mayroon itong kaakibat na kaparusahan.
Hindi rin aniya sapat ang paghingi ng tawad ng rebeldeng grupo at pag-amin sa pagkakamali ng kanilang mga kadre na maliban sa pinasabugan ay pinagbabaril pa ang mga ito ng mga sinasabing batang mandirigma.
Batay sa nakuhang necropsy report ng DWIZ patrol, may nakitang tama ng bala ng baril sa kanang mata si Keith maliban pa sa mga sugat na tinamo nito sa pagsabog.
Habang may nakita ring tama ng bala ng baril sa kaliwang hita at kanang balikat ni Nolven maliban din sa mga sugat ng pagsabog.
Kaya naman hamon ni Arevalo sa mga Komunista, ilabas, iharap at papanagutin sa batas ang mga kasamahan nila na nasa likod ng karumal-dumal na krimen sabay naman ng pagtitiyak ng AFP na kanilang ihahatid ang katarungan sa pamilya Absalon.
