Asahan na ang mas mabilis na distribusyon ng ayuda.
Ito ang tiniyak ni Social Welfare and Development Secretary Rolando Bautista matapos makaranas ang gobyerno ng aberya sa pamamahagi ng pondo mula sa social amelioration program.
Ayon kay Bautista, dahil sa mga aberya sa SAP distribution ay bumuo sila ng mas mabilis at episyenteng paraan ng pamamahagi ng cash assistance.
Kailangan anyang mag-ingat ang gobyerno sa pag-transfer ng pondo mula sa Department of Budget and Management patungo sa mga local government unit upang maiwasan ang korapsyon.
Aminado ang kalihim na naging malaking hamon para sa kanila ang pagkakaroon ng database ng mga benepisyaryo nang kanilang kunin ang serbisyo ng mga financial service provider para sa mas mabilis at contactless SAP distribution. —sa panulat ni Drew Nacino
