Patay ang 20 taong gulang na Criminology student matapos pagsasaksakin ng kapitbahay nilang tricycle driver sa Caloocan City.
Batay sa kwento ng ka-anak ng biktimang si Junel Talan, nag-amok ang kapitbahay nilang si Matias Avenido Jr. matapos hindi makadaan ang kaniyang minamanehong tricycle dahil sa mga nakaparadang motorsiklo.
Ayon sa pamilya Talan, bagama’t nakaparada ang mga motorsiklo sa tapat ng kanilang bahay, hindi nila ito pagmamay-ari.
Ganunpaman, pinagkakatok ng suspek ang bahay ng biktima hanggang sa nauwi ang pag-aamok ni Avenido sa pambubugbog sa pagitan ng suspek at kapatid ng biktima.
Dito na naglabas ng kutsilyo ang suspek kung saan nasasak sa dibdib si Talan na kaniyang ikinamatay.
Natapyas naman ang labi ng kapatid nito habang sugatan ang braso ng isa pa niyang kuya. Sugatan din sa ulo ang tiyahin ni Talan.
Nagawa namang tumakas ng suspek na mahaharap sa kasong murder at physical injuries.
