Aminado ang OCTA Research Group na maaaring matagalan pa ang gobyerno sa pagtukoy kung Delta variant ang kumakalat na klase ng COVID-19 sa Metro Manila.
Ayon kay Dr. Guido David ng OCTA, atrasado na ang mga inilalabas na report ng Philippine Genome Center (PGC) dahil sa mahabang prosesong pinagdaraanan ng gene sequencing.
Hindi naman lahat nage-genome sequencing nila. Ibig sabihin, pwede natin mag-estimate based on sampling. Ang isa pa, is ‘yong genome sequencing natin mga 2 to 4 weeks ang processing time. Napakatagal, ibig sabihin ‘yong nare-report nila yung iba namatay na, na-resolve na, nag-recover na, ani David”
Gayunman, nilinaw ni David na hindi naman na issue ang mabagal na proseso lalo’t malinaw na mayroon ng hawaan ng Delta variant.
Dapat anyang pagtuunan na lamang ng pansin kung paano mapababagal ang pagkalat ng mas nakahahawang COVID-19 variant.
Hindi naman natin sinisisi ang genome sequencing kasi at talagang may limitations ang genome sequencing natin. Unang-una, dalawa lang ata ‘yong genome sequencers natin nasa Metro Manila pareho. So, ‘yong mga galing sa probinsya pinapadala pa ‘yong mga samples dito sa Metro Manila, tsaka may time pa ‘yon sa pagpapadala. So hindi natin sinisisi pero ang sinasabi natin, we have to face the reality na resolved na karamihan. Kaya mahirap na rin i-trace ‘yong mga contact kasi nakalipas na. Kung namatay na, paano natin mate-trace ‘yong contacts doon?, ani David sa panayam ng DWIZ. — sa panulat ni Drew Nacino.
