Patay ang dating managing editor ng remate news online, remate express at ng ilang pahayagan makaraang pagbabarilin ng riding-in-tandem sa Quezon City.
Kinilala ang biktimang si Gwen Salamida-Diaz, 40 anyos, residente ng South Zinnia Condominium, barangay Katipunan habang nasa kritikal na kondisyon ang kanyang live-in-partner na si Oliver Perona.
Ayon sa QCPD – criminal investigation and detection unit, dakong alas-3:30 ng hapon nang maganap ang insidente sa pag-aaring Gott Salon and Spa ni Diaz sa Kaingin Road, barangay Apolonio Samson.
Abala sa paglilinis ng salon ang mga biktima bilang paghahanda sa pagbubukas nito kapag natapos na ang ipinatutupad na enhanced community quarantine nang pumasok ang isang lalaki.
Nagdeklara umano ng holdup ang salarin, subalit nanlaban sina Diaz kaya pinaputukan ang mga ito, pero wala namang nawawalang gamit ang mga biktima.
Inaalam na ng pulisya kung totoong holdup ang motibo sa krimen o may kinalaman sa trabaho nito bilang isang dating mamamahayag.—sa panulat ni Drew Nacino
