Sinumbatan ni Senator Bong Go ang kapwa mambabatas na si Senate Blue Ribbon Committee Chairman Richard Gordon sa plenaryo kaugnay sa maanomalya umanong transaksyon sa pagbili ng medical supplies.
Sa isang privilege speech, sinabi ni Go na hindi patas si Gordon sa imbestigasyon dahil ito lamang ang nagsasalita at hindi pinagbibigyan ang mga nagpapaliwanag na resource person.
Ayon kay Senator Go, kaisa siya sa paglaban sa katiwalian subalit sa tamang paraan at hindi sa paraan na pambu-bully.
Binuweltahan din ni Senator Go ang Committee Chairman sa pagpuna sa pag-akto pa rin niyang special assistant ni Pangulong Rodrigo Duterte.
Inamin naman ni Go na dahil sa pagiging malapit niya sa Pangulo ay tinawagan siya ni Gordon upang ipakiusap na i-appoint sa gobyerno ang isang tao, bagay na pinagbigyan naman ng Presidente. —sa ulat ni Cely Ortega Bueno (Patrol 19), sa panulat ni Drew Nacino
