Mistulang nakawala sa koral ang ilang taga-Metro Manila matapos dagsain ang mga mall at iba pang pasyalan sa ikalawang araw ng mas maluwag na alert level 2 sa National Capital Region.
Sa pag-iikot ng DWIZ, kabilang sa pinilahan ang mga kilalang mall sa Mandaluyong, Pasay at Quezon City.
Bagaman sarado pa rin ang Manila Bay Dolomite Beach, dinumog naman ng mga siklista at jogger, kasama ang kanilang mga anak, ang ibang bahagi ng Baywalk gaya sa C.C.P. COMPLEX at MOA Seaside sa Pasay City.
Inaasahan namang daragsa pa ang mas maraming mamamasyal ngayong linggo.
Samantala, muling pina-alalahanan ng Department of Health ang publiko lalo ang mga lumalabas para mamasyal na ugaling sumunod sa minimum health protocols. —sa panulat ni Drew Nacino
