Inilabas na ng Senate Blue Ribbon Committe sa pangunguna ng chairman nitong si Senator Richard Gordon ang partial report sa serye ng imbestigasyon sa umano’y katiwalian sa pagbili ng gobyerno ng 10 billion peso pandemic supplies mula sa Pharmally Pharmaceutical Corporation.
Sa 113 pahinang report, inirekomendang managot si Pangulong Rodrigo Duterte dahil sa Betrayal of Public Trust na isa umanong paglabag sa kanyang mandato sa ilalim ng kontitusyon;
Pagtatalaga sa Chinese National na si Michael Yang bilang Economic Adviser noong 2018; pagtanggap bilang supplier ng covid-19 supplies sa Pharmally kahit under-capitalized at pag-aari ni Yang, na pugante mula sa Taiwan;
Pag-discredit o paninira sa Commission on Audit (COA) at senado; pagbabawal sa mga opisyal ng ehekutibo na dumalo sa pagdinig ng senado at hindi pagpapapanagot sa mga sangkot sa anomalya sa pagbili ng pandemic supplies.
Dahil din umano sa inasal ng pangulo, hindi maaalis na magkaroon ng konklusyon na alam, pinayagan at kinunsinte nito ang kalokohan ng mga malalapit na associates at appointees.
Samantala, inirekomenda ring sampahan ng kasong plunder sina Health Secretary Franciso Duque, III; Atty. Lloyd Christopher Lao na dating chief ng procurement service ng DBM;
Kasalukuyang Deputy Ombudsman Warren Liong na dating kasamahan ni Lao sa PS-DBM; si Yang na umano’y financier ng Pharmally at ang Pharmally Officials na sina Linconn Ong, Mohit Dargani, Twinkle Dargani, Huwang Tzu Yen, Krizle Grace Mago at ang hindi pa nahahanap na si Lin Weixiong na sinasabing nasa Dubai. —sa ulat ni Cely Ortega-Bueno (Patrol 19)
