![GULAY supermarket palengke]](https://www.dwiz882am.com/wp-content/uploads/2021/01/GULAY-supermarket-palengke.jpg)
Dapat nang gamitin ng Department of Trade and Industry (DTI) ang kapangyarihan nito upang ma-kontrol ang presyo ng mga bilihin, alinsunod sa Price Act of 1992.
Ito, ayon sa mga grupong Kilusang Magbubukid ng Pilipinas at Anakpawis, ay para maabot ng mga manggagawa ang presyo ng basic goods.
Ayon kay Anakpawis Chairman at Dating Agrarian Reform Secretary Rafael Mariano, kung gugustuhin lamang ng gobyerno ay maaaring magrekomenda ang DTI ng price ceiling sa basic at prime commodities.
Dapat anyang gumawa na ng paraan ang pamahalaan upang maibsan ang epekto ng patuloy na pagtaas ng presyo ng mga bilihin at krudo sa nakalipas na dalawang linggo.
Sa ilalim ng Republic Act 7581 o Price Act of 1992, may kapangyarihan ang DTI na magtakda ng price ceiling para sa basic goods sa pamamagitan ng suggested retail prices.
Inaatasan din sa naturang batas ang mga retailer na magkaroon ng maximum selling price para sa individual products na kadalasang binibili ng mga ordinaryong consumer.
