Kasalukuyang iniimbestigahan ng Globe Telecom at ng National Telecommunications Commission (NTC) ang insidente ng hacking sa cellphone number ni dating MMDA Chairman Benhur Abalos.
Sinasabing nangyari ang hacking isang araw bago ang May 9 elections.
Sa kanyang post sa Facebook, sinabi ni Abalos na na-hack ang kanyang numero at nagpapadala ng mga mensahe sa mga nasa contacts niya.
“It has been sending out unscrupulous messages. [I] went to Globe office this afternoon to complain [about the hacking incident] and had the number immediately suspended,” ayon kay Abalos Jr., na siya ring national campaign manager ni Ferdinand “Bongbong” Marcos Jr.
Agad ipinarating ni Abalos Jr. sa Globe Telecom at sa NTC ang insidente.
Sa imbestigasyon at ginawang validation ng Globe, walang ipinadalang “unscrupulous messages” galing sa numero ni Abalos.
Ayon sa Globe security operations team, maaaring nabiktima si Abalos Jr. ng illegal broadcaster devices na bawal sa ilalim ng “The Radio Control Law” ng NTC.
Nabatid na iniimbestigahan na rin ng NTC ang nangyari at patuloy ang koordinasyon nito sa telco.
Sang-ayon naman ang NTC na maaaring ang nangyari ay insidente ng “SMS spoofing”.
Ayon sa Kaspersky, cybersecurity solutions provider, ang mga scammer na gumagamit ng “phone number spoofing” ay nakagagawa ng paraan para mapaniwala ang isang indbidwal na siya ay tumanggap ng mensahe o tawag mula sa isang partikular na numero.
Kasabay nito, binalaan ni NTC Commissioner Gamaliel Cordoba ang mga may-ari o nasa likod ng illegal broadcaster devices na maaari silang maharap sa kasong kriminal at civil penalties.
