Wala pa ring natatanggap na bayad mula sa gobyerno ang mga driver ng bus sa Libreng Sakay o PUV Service Contracting Program.
Ayon kay Joji Vizconde Jr., pangulo ng Buklod ng Manggagawa sa ES Transport, ilang transport workers sa ilalim ng ES Consortium ang tinanggal pa sa trabaho matapos na magprotesta noong Pebrero dahil sa delay na sahod.
Aabot na anya sa 20 million pesos ang utang ng gobyerno sa mga driver ng libreng sakay program kaya’t naghain na sila ng reklamo sa Department of Labor and Employment (DOLE).
Una nang inamin ng ES Consortium na atrasado ang paglalabas ng sweldo ng mga tsuper dahil sa pabago-bagong COVID-19 alert level status at iba’t-ibang proseso sa loob ng Consortium.
Dismayado na anya sila sa tila pagbubulag-bulagan at pagbibingi-bingihan ng mga ahensya ng gobyerno sa mga panawagan ng mga transport sector worker.
Sa ilalim ng contracting program, 30% ng lingguhang bayad ay mapupunta sa mga tsuper habang 70% sa mga operator, kung saan saklaw nito ang pang-araw-araw na operational at maintenance costs.