Inihayag ng Department of Health (DOH) na bukas at handa ang pamahalaan sa posibleng mga bagong bakunang ilalabas laban sa mga nagsulputang bagong sub-variants ng Covid-19.
Ayon kay Health Undersecretary Ma. Rosario Vergeire, patuloy na nagmu-mutate ang virus kung saan, lumalabas sa ngayon ang sub-lineage ng sub-variants.
Sinabi ni Vergeire na may mga bagong teknolohiya na sinusubukang mag-adapt o maging angkop sa mga sub-variant na lumalabas sa iba’t-ibang bahagi ng mundo.
Kabilang umano sa narinig na ng DOH na bagong bakuna ang “bivalent vaccines” ng Moderna pero kinukumpleto pa ang mga pag-aaral dito kabilang na ang epekto at benepisyo nito sa general population.
Sa kabila nito, tiniyak ni Vergeire sa publiko na ang kasalukuyang mga bakuna na itinuturok bilang primary series at booster shots ay epektibo parin o nakapagbibigay parin ng proteksiyon laban sa Covid-19.