Dahil sa pakikipagtulungan ng Globe, nasakote ng mga tauhan ng National Bureau of Investigation (NBI), Philippine National Police Anti Cybercrime Group (PNP ACG) at National Telecommunications Commission (NTC), ang isang lalaki na sinasabing nagbebenta ng GCash-registered SIM cards.
Ang suspek na si Mark Deo Antang, residente ng Camarin, Caloocan City ay nadakip sa ikinasang entrapment operation ng mga awtoridad.
Nahaharap si Antang sa kasong paglabag sa Sec. 4 ng Republic Act 10175 o Cybercrime Prevention Act, Section 4 na nagsasaad na maituturing na cybercrime offense ang ‘misuse of devices’.
Nabatid na naaktuhan si Antang habang nagbebenta umano ng Globe at TM SIM cards na mayroong beripikadong GCash accounts.
Kasabay nito, nagpasalamat naman si Globe Group Chief Legal Counsel Froilan Castelo sa NTC sa pamumuno ni Commissioner Gamaliel Cordoba, NBI at sa PNP ACG sa matagumpay na operasyon.
“People who sell GCash-registered SIM cards enable criminality by being accessories to fraud. We will not relent in this campaign,” wika ni Castelo.
Welcome development din para kay Cordoba ang pagkakaaresto kay Antang sa kasagsagan ng kampanya ng pamahalaan laban sa paglaganap ng text scams at cybercrime sa bansa.
“With systems now in place and the solid cooperation among various government agencies and telcos in fighting text scams and cybercrime, law enforcement efforts should now lead to more arrests,” pahayag ng NTC chief.
Samantala, umaasa si GCash chief risk officer Ingrid Berona na ang pagkakaaresto sa suspek ay magsisilbing babala sa iba pang nasa likod ng scam.
Nagkakaisa ang mga Telcos at gobyerno na kung maipapasa ang SIM Card Law ay makatutulong ito para maiwasang mabiktima ang publiko ng text scams at iba pang cybercrimes.
Maliban dito, suportado rin nila ang SIM Card Registration bills nina House Speaker Martin Romualdez, House ICT Chair Toby Tiangco, Senate President Migz Zubiri at Senate Public Service Chair Grace Poe.
