Patay ang dalawang bata dahil sa suffocation dulot ng sunog sa kanilang bahay sa Urrutia street sa Valenzuela City.
Ayon sa awtoridad, ang labi ng mga biktima na nasa edad tatlo at siyam ay natagpuan sa banyo ng kanilang bahay na nasunog dakong alas-8 ng umaga at tuluyang naapula mag-a-alas-9 ng umaga.
Ipinabatid ni Valenzuela City Mayor Wes Gatchalian na bagama’t napigilang kumalat ang nasabing sunog, hindi naman nakalabas ng kanilang bahay ang magkapatid na biktima dahil sa matinding usok.
Electrical wirings ang tinututukang dahilan ng nasabing sunog kung saan lumabas ang ina ng mga biktima para patayin ang fuse box, subalit lumakas na ang apoy nang makabalik ito.
Tiniyak ng Valenzuela City government ang psychological briefing sa ina, burial assistance, pagkain at iba pang tulong sa pamilya ng mga biktima na ang kanilang ama ay nagtatrabaho sa ibang bansa.
