Wala umanong kinalaman si dating Justice Secretary at kasalukuyang Solicitor-General Menardo Guevarra sa nadiskubreng tunnel sa New Bilibid Prison (NBP), sa Muntinlupa City.
Ipinaliwanag ni Guevarra na hindi na ipinaalam sa kanya ang excavation project sa Bilibid dahil isa na itong “operational matter” at hindi na kailangan ng kanyang approval.
Una nang inihayag ni Bureau of Corrections (BuCor) OIC Gregorio Catapang Jr. na inilihim ang paghuhukay dahil walang inilaang pondo para rito at ikinunsidera bilang illegal quarrying.
Bukod pa rito, sinabi rin ni Catapang na maaaring konektado o gagamitin ang tunnel sa paghuhukay ng kayamanan, pagpuslit ng mga kontrabando o lagusan para sa mga bilanggong nais tumakas. - sa panulat ni Hannah Oledan