Nasawi ang isang lalaki na hinihinalang gun-for-hire matapos makipagpalitan ng putok ng baril sa awtoridad matapos hindi tumigil sa checkpoint sa Quezon City habang napatay ng suspek ang TNVS rider na humabol sa kanya.
Sa isang ulat, kinilala ang suspek na si Richmond Mallari Dalisay, nasawi ang suspek sa police operation sa barangay Baesa.
Bago ang insidente, hindi huminto ang suspek sa checkpoint sa barangay Bahay Toro kaya hinabol ng mga pulis.
Ayon sa director ng Quezon City Police District na si Police Brigadier General Nicolas Torre III, nakasalubong ng suspek ang motorsiklo na kanyang inagawan habang hinahabol ng mga pulis. Isang TNVS rider ang tumulong na habulin ang suspek, subalit tinamaan ng bala ng baril dahilan ng pagkasawi.
Patuloy naman ang follow-up operation ng awtoridad para matunton ang salarin. —mula sa panulat ni Maize Aliño-Dayundayon
