Aabot sa mahigit 672 million dollars na halaga ng investment pledges ang naiuwi ni Pangulong Ferdinand Marcos Jr., mula sa kanyang pagdalo sa 30th Asia-Pacific Economic Cooperation Leader’s Meeting sa San Francisco, California.
Ayon sa Presidential Communications Office, kabilang sa investment pledges na nakuha ng pangulo ang 400 million dollars sa telecommunications sector; 250 million dollars sa semiconductor at electronics; 20 million dollars sa pharmaceutical at healthcare; at 2 million dollars naman sa artificial intelligence para sa weather forecasting.
Maliban sa mga ito, nakuha rin ni Pangulong Marcos ang commitment para sa suporta sa oncology hospital na magpapahusay sa accessibility at serbisyo para sa mga pasyenteng may cancer.
Karagdagang 1 billion dollars na halaga ng investment naman para sa semiconductor industry ang nakalinya na para sa negosasyon sa U.S. companies.
Nagkasundo rin ang Pilipinas at Amerika na magtutulungan para mapalakas ang semiconductor supply chain sa bansa.
