Pirmado na ni Pangulong Ferdinand Marcos Jr. ang batas na nagtatakda ng mas pinalawak na programa para sa pagkilala at pagbibigay ng antas sa edukasyon sa mga pilipino sa pamamagitan ng non-traditional mode.
Sa ilalim ng Republic act 12124 o Expanded Tertiary Education Equivalency and Accreditation Program, maaaring makakuha ng college diploma ang mga Pilipino, lalo na ang mga working professionals, sa pamamagitan ng pagkilala sa kanilang previous education, trainings, at work experiences.
Ang bagong batas ang tutukoy, mag-a-assess at magbibigay ng katumbas na degree sa mga kwalipikadong indibidwal batay sa kanilang natutunan mula sa pormal at di-pormal na sistema ng edukasyon, pati na rin sa kanilang propesyunal na karanasan.
Nabatid na ang Commission on Higher Education ang pangunahing ahensya na magpapatupad ng nasabing batas.
Kasama sa kanilang mga tungkulin ang pagpapahintulot sa higher education institutions na magbukas ng programa sa ilalim ng bagong batas.
